Psa 41 | YON | STEP | Yook ambo bi ye karub yeman. Dewid ye yook. Kanembed kamboknondan yaa meendene amun kamendimaan kuu ye kuu Godbed amun kerunoon. Ye yaa dabab mananeen kuu Yarimanbed awanene nen angka kowaneen.

Psalms 41

Yook 41

Yook ambo bi ye karub yeman. Dewid ye yook.

1 Kanembed kamboknondan yaa meendene amun kamendimaan kuu ye kuu Godbed amun kerunoon.
Ye yaa dabab mananeen kuuYarimanbed awanene nen angka kowaneen.
2 Yarimanbed ye nen dorondarene ye wadkeri kande kukbaneen,
kwane ye kuu okad yiri dobaraneen kuuYarimanbed amun kerunaneen,
kwane ye bondanbed yi dowaken yaambed ye yaa komo kamenandamiib kuyaa kuuYarimanbed domonenaanban.
3 Ye kuu anikad angkimbaraneen kuuYarimanbed aromkono konaneen,
kwane anikad angkeen yiri kuu ongmaneene wadkeraneen.
4 Kuned nembed yedmaan, “OYariman, eb yaa ambarakmaan kowe,
ne yaa mimyob keewe ongmewebko wadkera.” andaan.
5 Ne bondanbed ne yaa arud wandenib ne dowad dakmimaib,
“Aron komo arimbed bobnaneenkob yaningko kuu dowan keraneenka?” andimaib.
6 Yi kuyaom kuu mimo yembed neyiib yaa mene wedmewimaan kuu,
dudi weng dakmene ne weng kande amonombe weng arewa ongmene
bunangka wene kwane dakmen yarimaan.
7 Ne bondan korem kuu nedbenib kongewe koraaweng dakmenabimaib,
kwane yimbed ne dowad miin arewa kerok ande meenenib
8 yedmimaib, “Ye kuu karakiib ye bobobbed aye kowoon kowe,
ye kuyaa yiri angkeen kuu ika ma dembaanban.” andimaib.
9 Nangkodmi anam, ye yaambed yone dobaraan,
ye kuu ne om animan animaan kuned,
ye kangkon ne yaa manmo keroon.
10 Kumban, oYariman, eb kuu ne yaa mimyob keewe
ne nen ongmebko wadkera. Kwanebko nembed ne bondan yaa ingka.
11 Ne bondan kuu ne yaa nangme dorindeban keriwen kowe,
nekaadkeraan eb kuu ne yaa dowakeniib keruwewen.
12 Ne inameniib dobiriyiib dakmiyiib kuu ibmo kowe ebbed ne nenkooneneb,
eb arinambo ari aron korem yeman kowewen.
13 Yariman, Israeldan yi God kui, ye yaa amun kerunok,
yimin andowoon yirimbed wene aron korem korem kui.
Anam kwanok. Anam kwanok.